Sajak-sajak Semacca Andanant
KATAN RIK KILAK
Induh pepira katanni hati
Sulit haga tangi
Garpu gundang lesa di emamu
Nyamban rik magas hatiku
Kuteduh
Mak cukup angkah betadine ubatni
Kipak cawa mahap ngolok-ngulang
Tutuk bengih kimutmu nagu
Pagun juga mak tangi
Ulih kilak manjang juga kuliyak
Jakarta, 10/05/19
UBAT SAKIK HATI
Ki nutuk perosni hati
kantu nyak radu tandak
lebon induh sungi
Ulih lijung ubatni sakik hati
Jakarta, 09/01/17
INA
Ina
Mak bandinganni kahut-andanmu di nyak
Setakar jaman
Waini mahmu, mak ngedok rega najin sang tiyak
Risok niku lupa mengan
Malah mak sepedoman
Ulih niku mastiko anakmu dilom keadaan aman
Tano niku radu mak lagi
Radu mulang, diandan jama Ya
Hinok lelok dilom kahut-Na
Di lom gering-Na
Ikah dua sai dapok jadi jambat
Kukilu dilom sumbah pengatu
Kalau do ina “rittok rik tottok” di lom kepawaran
Ulih Ya kebuwak segala kedamaian
Mahapko anakmu ki selama hinji risok nyakikko hati
Ulih buguku mak dapok nyenangko niku
Jakarta, 22 Des 2018
SAKIK HATI
Mahap kantik
Layin hikam mak nabik
Cuba pai mu penyin pai
Api sai radu jak mu guwai?
Bawakku mukatani
Hatiku juga musakik
Induh api sai dapok nyanik ya tangi
Mak cukup sang tiyak betadine
Atawa setegak wai bura
Sunyin bakal tesimpon
Di lom jiwaku sai mak manggon
Jakarta,10/06/2010
LALIKA
Goh tiyak imbun di kala pagi
Reno kinjuk geringku
Rilau-mukilau resop dihati
Kutanom kumbang di lambung bumi
Kalau ya tuwoh hanggum di hati
Kidang ya ganta jajau rasani hati
Gering sai kutunggu nyegokko budi
Labung mit bumi moloh mit langik
Nyimbak dibadan jadi lalika
Katan hatiku cadang jiwaku
Niku yu sayang nyanik nyak ciwa
20/02/2014
———————
Semacca Andanant, lahir di Kotaagung, 29 Desember 1974. Bukuni, Lapah Kidah Sangu Bismilah: Bandung & Hahiwang (2018) menang Hadiah Sastera Rancage 2020. Buku puisi sai ampai, Katan rik Kilak (2020).
