Sajak-sajak Udo Z Karzi
DIBI ILUNG MERELOM
kak duma
dang relom ga
kanah mulang
renglaya adu mekelom
burung sapsada adu kebunyi:
“saap sa da…, saap sa da…”
reno bunyini beulang-ulang
tilajuko
“saap sa da… mulang geta”
adu dibi ilung manom
sai lagi beguai di darak
atawa kebun mustimu begeluk
mulang
kak adu dibi
mecul sai-sai jak kebun
atawa darak mit renglaya
ngebabai sai ngebabai
nyuncun sai nyuncun
nyerdang sai nyerdang
tenguleh ngunduh kahwa
USIM KAHWA, 1
sai kuingok kak usim kahwa
hara rum ni imbau ni kembang
rik wah ni kupi sai adu mesak
jak batang-batang ni
lelawa riyang ni ngeliak
kembang kupi
wah ni sai ujau
rik mesuluh
adu kari tiunduh!
USIM KAHWA, 2
ani mak,
“putil sai adu metuha
cuba keroh
kik adu metiha
adu metuha.
kidang kik wahni
lagi melemoh
retini lagi mengura”
kidang nyak risok
mak nutuk cawa
jak bangikni
ngeliak kupi suluh
ani tamong,
“mesak unyin kupimu”
USIM KAHWA, 3
nyak aga ngucak-ngucak pai
api nihan retini repong kahwa
bagini jelma pekonku
— mak apdol betetanoman
kik mak namom kahwa
maka ni
selipas, pantau, tebakandis,
seranggas, sebidak, heru
kidupan rik uncuk jadi repong ni
jelma pekon ngebun kahwa
sememanjang renglaya
sebeberakni umbul-umbul
sai wat kebun kupi
jak kupi ji do
sekam jelma pekon
mehengas-urik
jak kahwa muneh
ulun sekula, cakak haji
rik nyusun rengkaca
USIM KAHWA, 4
kak dibi-dibi meredik sanjor
sai-sai ulun mecul jak kebun
unggal jelma ngusung kahwa
kik makai bebalang
kik mamang, mak ketiru,
ia ngusung karung balak
sai dipikkoni di uluni
sanak-sanak ngiwakko karung lunik
sai sara, bebai sai nyerdang-nyuncun
ngebabai muneh
kiri kanan bakul
ulu nyuncu jeruwan
di kudan ngebabai sanak upi
lelawa guwai ni bebai
USIM KAHWA, 5
kemutik-kemutik ni kembang
mulai mecul jak unggal rumpun kahwa
warna andak kembang kahwa udi
minjak di hantara bulung ujau
sang bidang tanoh jama batang-batang
kahwa tuha teninggal ni tuyuk turing
tanno adu jadi repong sai miyos
uleh ni batang kahwa mulai mebalak
: serebok lagi nguwah kadu ni ngunduh
aih, wat muli mecul jak rumpun kahwa
mata ni kicop-kicop injuk bintang lunik
kimut mak nihan tekas jak biber ni
muli lunik begelayut di layang ni
injuk kembang kahwa sai tabor di ati
sang pasang napuh tangkop di batang kahwa
sebebua daleh ngecericit pakai bunyia alus
pasangan napuh seno geguyah alibambang
sai basa ni ngisop madu ni kembang
alibambang kambor maleh mit pampang bareh
pepira pampang kahwa tejunjom mit bah
sang pasang napuh maseh riya riyang
luncat-luncat di batang
cericit ni tian nyani musik alam
sai merdu
: angin gunung nyebu pepelegohan
—————-
Udo Z Karzi, laher 12 Juni 1970 di Liwa, Lampung. Penerima Penghargaan Kamaroedin 2014 jak Aliansi Jurnalis Independen (AJI) Bandar Lampung inji nulis delom bahasa Indonesia rik Lampung. Buku puisi ni, Mak Dawah Mak Dibingi (2007) ngena Hadiah Sastra Rancage 2008 rik novel ni Negarabatin (2016) ngemenangko Hadiah Sastra Rancage 2017. Buku ni sai paling ampai, Setiwang (kumpulan sajak, 2020) rik Jejak-jejak Literer: Bibliografi Sastra Lampung [1960-2020] (2021).
