Di Hadap ni Hukum
Cerbun Franz Kafka
DI hadap ni hukum cecok sai ngejaga rangok. Sai jelma jak pekon ratong ngedi sai ngejaga rangok rik nangguh haga ngehadap hukum. Kidang sai ngejaga rangok seno nulak haga ngeni ni izin kuruk tanno.
Jelma pekon seno ngeluleh, api diri ni kasi kuruk? “Seno halok, kidang mak tanno,” timbal sai ngejaga rangok. Kala rangok pengadilan seno tebuka injuk biasa ni rik sai ngejaga rangok nyimbin, jelma pekon seno radu ngeliak mit lapang delom pengadilan.
Kala sai ngejaga rangok mandai’i ni, ngimut rik cawa, “Kik niku haga nyuba ni, mengapi mak kuruk riya, kik pak tihalang. Kidang ingok, nyak sai kuasa. Rik nyak ingkah sai ngejaga rangok sai paling rebah. Kidang jak lapang mit lapang bareh ni radu dijaga agi sai ngejaga rangok, sai jama sai bareh ni tambah langgar kekuasaan ni. Malah, nyak mak dacok nanggung di rangok ke telu.”
Jelma pekon seno mak ngehagako keselanan. Hukum musti belaku adil jama seunyin ni jelma, ya miker. Kidang ya tanno bunjak ngeleliyak sai ngejaga rangok sai makai jaket balak bebulu, beirung mancung, rik bejangguk kejung rik tipis. Ya maseh optimis haga dapok mansa izin kuruk. Sai ngejaga rangok ngeni bangku lunik daleh ngayun mejong di redik rangok. Ya mejong berani-rani, malah betahun-tahun. Ya nyuba nangguh kuruk, kidang mak dikeni jama sai ngejaga rangok. Malah sai ngejaga rangok ngeluleh jama jelma pekon seno hal keluarga ni rik ngicik lamon hal, kida sai diluleh ni nyani busen.
Sai ngejaga rangok belagak injuk tuwan balak, aher ni ya pagun cawa luwot, bahawa jelma pekon seno makkung kasi kuruk. Jelma pekon seno ngusung lamon sangu berega delom lapahan ni, jama mudah pakai nyuap sai ngejaga rangok. Kidang sai ngejaga rangok cawa, “Nyak ingkah nerima ni, sehinggo niku dang bepiker, niku radu semena-mena jama seunyin ni.”
Seradu liwat betahun-tahun, jelma pekon seno ngeleliyak sai ngejaga rangok terus-terusan. Ya lupa jama sai ngejaga rangok sai bareh rik sai ngejaga rangok kesai seno ingkah yaddo halangan haga ngehadap hukum. Ya ngutuk nasib urak ni, jama tahun-tahu mena rik jama latak di kepepelegohan ni, seradu ya tambah tuha, ya risok ngeribok ngeranuh jama diri ni tenggalan.
Ya jadi mesesanak rik sekejung pengliyakan ni jama sai ngejaga rangok, ya mulai pandai wat kutu di jaket bulu ni. Ya bukilu nyin kutu seno nulung ni haga ngubah sikap sai ngejaga rangok.
Aher ni, pengliyakan ni tambah merudap, rik ya mak pandai lagi, kik rani tambah kelom atawa kik mata ni radu ngebudiko diri ni. Kidang ya tambah sadar, hara susah ni ngandanko hukum. Ya mak betahan urik bunjak saka ni lagi. Semakkung ya mati, seunyin ni pengalaman ni tikumpulko delom ati ni pakai ngehalu pelulehan sai, sai ya tenggalan makkung ngeluleh ni jama sai ngejaga rangok.
Ya ngurau sai ngejaga rangok, kik pak ya tenggalan mak dacok ngiwakko badan ni sai megunggong. Sai ngejaga rangok seno musti ngebungkuk rebah nihan, mani kelanggaran di hantara tian ruwa radu berubah, lamon sai nyengsarako jelma pekon seno.
“Niku maseh terok ngeluleh api lagi?” luleh sai ngejaga rangok, “niku merakus.” “Seunyin ni jelma berusaha berurusan jama hukum,” ani jelma seno.
“Repa mehalok, betahun-tahun saka ni, mak sai jelma nihan, kik mak nyak sai radu nangguh ngehadap hukum?”
Sai ngejaga rangok seno sadar, bahawa jelma seno radu ngerediki kematian, sebareh kebuguan ni melapok, rik pakai kuruk sai ngejaga rangok cawa matang jama jelma pekon, “Mak ngedok jelma bareh sai mangsa izin kuruk mit dija, mani rangok inji timaksudko ingkah pakai niku. Tanno nyak tindak rik nyak nyalok rangok ni.” []
———-
Judul asli bahasa Jerman: “Vor dem Gesetz”
Judul bahasa Indonesia: “Di Depan Hukum” diterjemahko Sigit
Susanto
Judul bahasa Lampung: “Di Hadap ni Hukum”, diterjemahko agi Udo Z Karzi
