Sajak-sajak Elly Dharmawanti
RELOM BINGI MAK PEDOM
Relom bingi mak pedom
Uleh ni santor miwang
Bubiti sakik ni hurik
Mak ngedok sai wat ngandan
Dang setanya di hati
Terok ni gegoh hulun
Mak budaya badan ji lawi
Segala cara mak kesimpun
Kintu beserah diri
Jama sai maha kuasa
Kekalau wat rubah ni
Kik Mak taru usaha
Pandai do tuhan ngimbang ni
Sepai sai halok diya
BULEHOT
Hara bangik ni hurik
Kik badan jak sakula
Melamon indai kantik
Pakai bululeh nanya
Dacok sebagi ilmu
Mekejung di akal ni
Jawoh jak kena budi
Dacok nulung indai kanca
Reno dia puwari nyak bulehot di keti
Tiuyunkon sekula pakai bekal kak nanti
Dang lupa ilmu agama jadi pedoman ni
Uleh hurik di dunia mesti ni tipastiti
Seno lehot ni tian sai adu mena
SANSAI HATI
Mabuya niku badan
Nyansai sansaikon hati
Ngelapahi ni nenggalan
Mak ngedok rang pugantung ni
Luh luwar mak tirasa
Hiting nyangu di badan
Hurik di lambung bumi
Nayah lamon tedosan
Kipak radu pastiti
Ngeriyap kiri kanan
Risok mak keduloran
Alloh Tuhanku robi
Seno do rang bugaga
Ngiman nasip mu badan
Kalau mak reji juga
SAI RADU NANGON RADU
Api sai dihiwangkon gila
Kik barang adu radu
Kintu ihlaskon riya
Sai radu nangon radu
Kindang kik mawat juga
Pera pera goh ano
In mepampan hatimu
Kindang piker pai luwot
Mawat kik ngedok guna ni
Dang ngandan balak ni hati
Kanah niku sai karrom
Uleh ni guwai sinji
KECANDANG
Payu ram lapah kecandang
Anggok pak adu mawas
Ija getta ram minjak
Kalau mekung hak tucer
Kecandang di rang ni hulun
lamon rang numpang ngekar
kerjakon buayuyun
dang nihan ngakal nyimot
sepira ni guwai senno mawat
nungngah kik resikko ni
Unggal ram hurik buyun
Mak lamon cuwak cuweh
Dipa ya juga rang ni tepik
Tilapahi lalegoh
Wat gawoh ranglaya ni
Wat gawoh rejeki ni
—————-
Elly Dharmawanti, lahir dan menetap di Krui, Pesisir Barat. Lulusan Ilmu Komunikasi Universitas Tulang Bawang (UTB) Bandar Lampung. Pemenang Hadiah Sastra Rancage 2021 untuk buku puisi Dang Miwang Niku Ading (2020). Buku-bukunya yang lain: Tumi Mit Kota (kumpulan cerbun bersama Udo Z Karzi, 2013), Sekekejung ni Pesiser Semamanjang ni Angangon (kumpulan sajak bersama SW Teofani, 2016) ,dan Sanjor Induh Kepira (kumpulan sajak, 2018). Puisi dan cerpennya juga termuat dalam Negeri Para Penyair: Antologi Puisi Mutakhir Lampung (2018) dan Negeri yang Terapung: Antologi Cerpen Mutakhir Lampung (2018).
